Plantun de Prouvènço

Pèr coumpara dos planto d'encò nostre

Carex humilis & Myosotis laxa

Queirello(-menudo)

Carex humilis

Cyperaceae

Àutri noum : Moutouso, Sagneto.

Noms en français : Laîche basse, Laîche naîne.

Descripcioun :
Aquesto moutouso èi coumuno dins tout lou relarg prouvençau. Trachis en mato basso (15 cm) en formo de courouno emé de fueio primo. Se vèson pulèu lis espiguet mascle que sorton un pau alor que li femello se vèson pas gaire tant soun mistoulin. I'a un soulet espiguet mascle e 2 à 3 (5) espiguet femello. Li flour femello an 3 estimato. Coumpara emé Carex halleriana que resto dins lou meme relarg e ié sèmblo un pau.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : Pancaro entresigna
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Carex
Famiho : Cyperaceae

Ordre : Poales

Coulour de la flour : Blanco
Petalo : ges
Ø (o loungour) flour : Pancaro entresigna
Flourido : Printèms

Sòu : Ca
Autour basso e auto : Pancaro entresigna
Aparado : Noun

Liò : Colo - Basso mountagno - Tepiero seco
Estànci : Mesoumediterran à Subaupen
Couroulougi : Pancaro entresigna
Ref. sc. : Carex humilis Leyss., 1758

Te-vese-e-t'ame(-fourro-bourro)

Myosotis laxa

Boraginaceae

Àutri noum : Ti-viéu-e-t'aìmi, Uei-de-l'enfant-Jèsu.

Nom en français : Myosotis gazonnant.

Descripcioun :
Aquéu te-vese-e-t'ame, pulèu rare, trachis en ribo de ribiero, dins li prado umido e li roubino de palun. Emé si péu contro li sepalo se destrìo dis aùtri Myosotis di flour pas trop grosso. Tambèn, i'a ges de bratèio dins l'enflourejado e lou "calice" crèis proun après la flourido.

Usanço :
Li flour podon se bouta dins lou mesclun. Se dis que li te-vese-e-t'ame soun vertuous contro l'enflamacioun, majamen pèr lis iue ("principe di signaturo").